Dekabrın 25-i Xəzər İntellektual Gənclər Klubunun üzvləri arasında öz gərginliyi ilə yadda qaldı. Belə ki, həmin gün “Xəzər”lilər ardıcıl iki tur oynamalı oldular.
Dövrənin 4-cü turu “İstiqlal” komandasının aparıcılığı ilə baş tutdu. Yüksək liqada dövrə boyu gözəl oyun nümayiş etdirmiş “Sakit” komandası bu turda da digər komandalardan seçildi. Komanda 14 suala doğru cavab verdiyi halda ən yaxın rəqibi “KiPL”də bu göstərici 9-a bərabər oldu. Bununla da “Sakit” komandası iştirak etdiyi 3 oyunda öz hesabına mümkün olan maksimum xalı (30 xal) yazdıra bildi.
İkinci liqada isə bu tur da lider dəyişmədi. “V” komandası bir daha rəqiblərinə əlçatmaz olduğunu göstərə bildi. “Artosfera” və “Alliance” komandaları yenidən ikinci və üçüncü yerləri bölüşməli oldular.
Qısa fasilədən sonra “KiPL” komandasının aparıcısı olduğu 5-ci tur start götürdü. Həlledici hesab olunan bu turun yekunları birinciliyə o qədər də təsir göstərə bilmədi. Belə ki, oyun ərzində daha çox sualı düzgün cavablandırmış “İstiqlal” komandası yalnız turun qalibi adına iddia edə bildi. Dövrənin çempionu isə ötən turlarda birinciliyi heç kəslə bölüşməyən, nəticədə aktivinə 38 xal yaza bilmiş “Sakit” komandası oldu. İkinci yerə 32 xalla “İstiqlal”, üçüncü yerə isə 28,5 xalla “KiPL” komandaları sahibləndi. “Land of fire” komandasından cəmi 0,5 xalla geri qalmış “TM-9” komandası isə yüksək liqanı tərk etməli oldu.
İkinci liqada isə yenə də “V” komandasının möhtəşəm oyunu izlənildi. Bu dəfə də digər komandalardan üstün olduğunu sübut edə bilmiş komanda maksimum göstərici ilə – 75 xalla birincilik əldə edərək yüksək liqaya vəsiqə qazandı. Yekun nəticədə “Alliance” komandası 2-ci, “Artosfera” isə 3-cü oldu.
34-cü dövrənin bitməsi ilə Xəzər İntellektual Gənclər Klubunda “Nə? Harada? Nə zaman?” oyunlarına müvəqqəti fasilə verildi. Bu fasilə müddətində “Fərdi oyun” üzrə bir neçə turnirin keçiriləcəyi gözlənilir.

Xəzər İntellektual Gənclər Klubunda 34-cü dövrənin 3-cü turu dekabrın 11-də baş tutdu. Birinci və ikinci liqaların gərgin mübarizəsi şəraitində keçən turun aparıcısı “Land of fire” komandası oldu. 25 suallıq paket bu dəfə “Sakit” komandasına uğur gətirdi. Daha çox sualı doğru cavablandırmış “Sakit” hazırda artıq aparıcı olmuş komandalar arasında liderdir. Bu tur yüksək liqada ikincilik isə “İstiqlal” komandasının aktivinə yazıldı.

İkinci liqada isə hələ də “V” komandasının üstünlüyü davam edir. Ardıcıl üçüncü tur hamıdan çox suala cavab tapmış komanda liqanın açıq-aşkar lideridir. “V”-nin ən yaxın rəqibləri isə “Alliance” və “Artosfera” komandalarıdır.

Qarşıda isə yekun nəticələrə təsir edəcək daha iki tur var. Növbəti tur dekabrın 18-i “İstiqlal” komandasının aparıcılığı ilə baş tutacaq.

Dekabrın 4-ündə Xəzər İntellektual Gənclər Klubunda 34-cü dövrənin 2-ci turu “Sakit” komandasının aparıcılığı ilə baş tutdu. Bu tur həm birinci, həm də ikinci liqa üçün gərgin mübarizə ilə yadda qaldı. Yüksək liqa komandalarından “İstiqlal” və “KiPL” eyni qədər suala doğru cavab verərək turnir cədvəlində yerlərini möhkəmlətdilər. Onları çox kiçik xal fərqi ilə “Land of fire” və “TM9” komandaları izləyir.

İkinci liqadan yüksək liqaya vəsiqə qazanmaq istəyən komandalar da mübarizəni davam etdirirlər. Bu dövrə parlaq çıxışı ilə yadda qalan “V” komandası ikinci turda da öz sözünü deməyi bacardı. 11 suala doğru cavab verə bilmiş komanda turnir cədvəlində öz liderliyini qoruyur. “V”-ni aktivində daha az xal olan “Alliance” və “Artosfera” komandaları izləyir.
Xatırladaq ki, komandaları qarşıda daha 3 tur gözləyir. Dekabrın 11-də keçiriləcək növbəti – 3-cü turun aparıcısı “Land of fire” komandası olacaq.

Xəzər İntellektual Gənclər Klubunda 33-cü dövrəsinin 3-cü turunun suallarını və aparıcılığını “İstiqlal” komandası təşkil etdi. Birinci və ikinci liqaların iştirakı ilə baş tutan oyun maraqlı mübarizə şəraitində keçdi. Nəticədə, Yüksək liqada “Land of fire” komandası daha çox sualı doğru cavablandıraraq ilk yerdə qərarlaşdı. İkinci və üçüncü yerləri isə “KiPL” və “Diplomat” komandaları bölüşdü.

İkinci liqada elitaya vəsiqə qazanmaq uğrunda ciddi mübarizə gedir. Bu turda “Optimist”, “Kranium” və “TM 9” komandaları daha uğurlu oyun nümayiş etdirdilər. Ümumilikdə isə son turun nəticələrinə görə ikinci liqada ilk yerdə 25, 5 xalla “TM 9” komandası qərar tutub. Onu aktivində 24 xal olan “Artosfera” və 21 xala sahib “Alliance” komandaları izləyirlər.

Xatırladaq ki, 5 turdan ibarət olan dövrənin başa çatmasına hələ 2 tur var. Hazırkı nəticələrə əsasən Yüksək liqada ilk yeri ötən dövrənin qalibi olmuş “Diplomat” komandası tutur. Oktyabrın 30-da baş tutacaq növbəti oyunun aparıcısı da məhz bu komanda olacaq.

Klubun digər layihəsi Məktəb liqasında çempion Dəyanət liseyinin “Hilal” komandası oldu.

Qaliblər müxtəlif prizlər və GRBS-dən ingilis dili kurslarına pulsuz iştirak hüququ qazandılar.

Təşkilat haqqında:
Xəzər İntellektual Gənclər Klubu 2001-ci ildə yaradılıb. Klubun yaradılmasının və fəaliyyətinin əsas məqsədi ölkədə Azərbaycan dilində intellektual oyunlar hərəkatının inkişafını təmin etməkdir. Xəzər İntellektual Gənclər Klubu hal-hazırda BDU, ATU və Bakı Slavyan Universitetində fəaliyyət göstərir. Oyunlar hər şənbə və bazar günləri təşkil olunur.

5 oyundan ibarət olan ilk dövrədə klubun yüksək liqalarının komandaları yarışacaqlar. Xəzər İntellektual Gənclər Klubunun həyata keçirdiyi Universitet liqası və Məktəb liqaları layihələri çərçivəsində baş tutacaq oyunlar isə ali və orta təhsil müəssisələrində dərslər başladıqdan sonra start götürəcək.

Nizam-intizam nisbətən yaxşı idi. Hər halda başım o qədər də ağrımadı. Bəlkə də komandalara arxa çevirdiyim üçün səs-küyü hiss etmədim. Oyunda o qədər də güclü rəqabət olmadı. “Fatehlər” rəqiblərini üstələdilər və qalib gəldilər. “Cihad”la “Diplomat” yalnız izləmə mövqeyi tutdular. İkinci liqada “Ergenekon”un artıq ənənəyə çevrilən stabil çıxışı yadda qaldı.

Hazırladı Aqşin Atalızadə

Suallar: Sakit – yozumsuz, “BİM Yunayted” – turnirdən sonra yalnız sual xətrinə sualların olacağı aydın idi.

Aparıcılıq: Əvvəlki oyunların şərhinə bax + məddahnamələrində mənə də yer ayırdığına görə Eminova təşəkkür edirəm.

İntizam: Əvvəlki oyunların şərhinə bax.

Oyunun gedişi: Zal elə bil ki, boş idi. Bunu yay imtahan sessiyalarının başlanması ilə də izah eləmək olar. Amma heç də yaxşı əlamət deyil. “Cihad” komandası özünü Eminovun şüuru səviyyəsinə lazımınca endirə bilməyi bacardığından inamlı qələbə qazandı – 15 xal. “KİPL”-in də Fuadı yaxşı tanıdığı aydın oldu – 12. Qalanları isə zülm çəkdilər. Birinci liqada “Ergenokan”a rəqib tapılmadı – 11

Aqşin Atalızadə

Başlayaq qüsurlardan. Paketlər yenə ayrı idi. “Cihad”da isə üç paket və yazılmamış suallar vardı. Nəticədə lazımi formada həkk olunmamış suallar o qədər də yaddaqalan olmadı.

Bugün gözəl suallar günü idi. “Cihad” komandasına, əsasən də Tural Dadaşova əlimdən yalnız təşəkkür etmək gəlir. Adi dövrə oyunlarına hər dəfə gözəl və baxımlı suallar çıxarmaq çətin işdi. Yadımda 3 gözəl sual qalıb: «Paxır», «Arximed» və «Abort». Əslində suallara gözəllik qatan faktlar deyil, onun tərtib olunma formasıdır. Məhz bunun bəzilərinə gözəl sual deyirik, digərləri isə heç yadımızda qalmır. Oktay Məhərrəmova görə «Paxır» başqa cür formula edilsəydi, daha asan olardı. Ancaq, fikrimcə, «Paxır»da hər hansı bir dəyişiklik, onun «paxır»ını açardı. Təəssüf ki, komandalar sadəcə olaraq anadolu leksikonundan istifadə edərək sualı tapdılar.
«Arximed»in müəllifinin şeirdə sual elementlərini tapması və onu lazımi formada tərtib etməsi yaxşı effekt verdi. «Abort» isə bəzi komandaların kinayəli gülüşlərinə baxmayaraq sadəcə GÖZƏL sual idi.

“Dream-Team”in suallarının bir qüsuru var idi, o da «Cihad»dan geri qalması. Əslində normal suallar idi. Sadəcə olaraq komandanın sualları yaxşı formula etmək bacarığı hələ formalaşmayıb.

Nizam-intizam isə yenə də yerində deyildi. Aparıcılardan xahiş edirəm ki, gələcəkdə ümumi sakitlik yaratsınlar, ondan sonra sualları elan etsinlər. Bəzi sualların əvvəlini, bəzilərinin isə axırını eşitmək olmurdu. Ümumiyyətlə, klubda insanı dəli edəcək səviyyədə səs-küy var. Burda məşhur Ağanatiqin sözləri yadıma düşdü: “Deyəsən, mənim kimi qocalmaq istəyirsiniz….. İstəmirsinizsə, sakit olun”. Başqalarını bilmirəm, mən yalnız ilk 5-6 suala normal başla qulaq asıram.

Qeyd etmək lazımdır ki, bugünkü oyunda komandaların azlığı diqqət çəkdi. Elə ümumi baxışla da zalda boşluq olduğu görünürdü. Seymur Teymurovun gəlişi də bu boşluğu doldurmadı. Oyunun gedişi gözlənilən kimi oldu. İlk suallardan sonra ənənəvi olaraq aydın gözəçarpan lider yox idi. Lakin, son turnir qalibi «KİPL»in geniş heyətlə çıxış etməsi, onların qələbəsini gözlənilən etmişdi. «Fatehlər» və «Diplomat»ın əsas rəqiblərinə çatmaq ehtimalı az idi. Nəticədə «KİPL» əsas rəqiblərini xeyli qabaqlayaraq 14 xalla inamlı qələbə qazandı.
Aşağı liqada komandalarla birlikdə rəqabətin də azalması davam edir. Yenə də Ergenekonun zəif çıxışı zəminində Fortuna qalib gəldi.

Hazırladı Aqşin Atalızadə